ਸਪੋਰਟਸ, 25 ਨਵੰਬਰ 2025: IND ਬਨਾਮ SA 2nd Test: ਭਾਰਤ ਨੂੰ ਗੁਹਾਟੀ ਟੈਸਟ ‘ਚ ਹਾਰ ਦਾ ਖ਼ਤਰਾ ਵਧਦਾ ਜਾ ਰਿਹਾ ਹੈ। ਮੰਗਲਵਾਰ ਨੂੰ ਦੱਖਣੀ ਅਫਰੀਕਾ ਤੋਂ ਮਿਲੇ 549 ਦੌੜਾਂ ਦੇ ਵਿਸ਼ਾਲ ਟੀਚੇ ਦਾ ਪਿੱਛਾ ਕਰਦੇ ਹੋਏ, ਭਾਰਤ ਨੇ ਚੌਥੇ ਦਿਨ 27 ਦੌੜਾਂ ‘ਤੇ 2 ਵਿਕਟਾਂ ਗੁਆ ਦਿੱਤੀਆਂ। ਇਸ ਤੋਂ ਪਹਿਲਾਂ, ਦੱਖਣੀ ਅਫਰੀਕਾ ਨੇ ਆਪਣੀ ਦੂਜੀ ਪਾਰੀ 260/5 ‘ਤੇ ਐਲਾਨ ਦਿੱਤੀ ਸੀ।
ਬਰਸਾਪਾਰਾ ਸਟੇਡੀਅਮ ‘ਚ ਯਸ਼ਸਵੀ ਜੈਸਵਾਲ (Yashasvi Jaiswal) 2500 ਟੈਸਟ ਦੌੜਾਂ ਬਣਾਉਣ ਵਾਲੇ ਚੌਥੇ ਸਭ ਤੋਂ ਤੇਜ਼ ਭਾਰਤੀ ਬਣੇ। ਦੱਖਣੀ ਅਫਰੀਕਾ ਨੇ ਭਾਰਤੀ ਧਰਤੀ ‘ਤੇ ਹੁਣ ਤੱਕ ਦਾ ਸਭ ਤੋਂ ਵੱਡਾ ਟੀਚਾ ਬਣਾ ਕੇ ਦਬਾਅ ਹੋਰ ਵਧਾ ਦਿੱਤਾ। ਮੈਚ ਦੌਰਾਨ, ਤੇਜ਼ ਗੇਂਦਬਾਜ਼ ਮੁਹੰਮਦ ਸਿਰਾਜ ਫੀਲਡਿੰਗ ਕਰਦੇ ਸਮੇਂ ਜ਼ਖਮੀ ਹੋ ਗਿਆ ਅਤੇ ਉਸਨੂੰ ਮੈਦਾਨ ਛੱਡਣਾ ਪਿਆ।
ਰਵਿੰਦਰ ਜਡੇਜਾ (Ravindra Jadeja) ਦੱਖਣੀ ਅਫਰੀਕਾ ਵਿਰੁੱਧ 50+ ਟੈਸਟ ਵਿਕਟਾਂ ਲੈਣ ਵਾਲੇ ਪੰਜਵੇਂ ਭਾਰਤੀ ਗੇਂਦਬਾਜ਼ ਬਣੇ। ਇਸਤੋਂ ਪਹਿਲਾਂ ਅਨਿਲ ਕੁੰਬਲੇ, ਜਵਾਗਲ ਸ਼੍ਰੀਨਾਥ, ਹਰਭਜਨ ਸਿੰਘ ਅਤੇ ਰਵੀਚੰਦਰਨ ਅਸ਼ਵਿਨ ਨੇ ਇਹ ਉਪਲਬਧੀ ਹਾਸਲ ਕੀਤੀ ਹੈ।
ਦੱਖਣੀ ਅਫਰੀਕਾ ਵਿਰੁੱਧ 84 ਵਿਕਟਾਂ ਲੈ ਕੇ ਕੁੰਬਲੇ ਸੂਚੀ ‘ਚ ਸਿਖਰ ‘ਤੇ ਹੈ। ਸ਼੍ਰੀਨਾਥ 64 ਵਿਕਟਾਂ ਨਾਲ ਦੂਜੇ ਸਥਾਨ ‘ਤੇ ਹਨ, ਜਦੋਂ ਕਿ ਹਰਭਜਨ ਸਿੰਘ ਨੇ 60 ਅਤੇ ਅਸ਼ਵਿਨ ਨੇ 57 ਵਿਕਟਾਂ ਲਈਆਂ ਹਨ। ਹੁਣ ਜਡੇਜਾ ਵੀ 52 ਵਿਕਟਾਂ ਨਾਲ ਇਸ ਕਲੱਬ ‘ਚ ਸ਼ਾਮਲ ਹੋ ਗਏ ਹਨ। ਖਾਸ ਗੱਲ ਇਹ ਹੈ ਕਿ ਉਨ੍ਹਾਂ ਦੀ ਔਸਤ (19.6) ਸੂਚੀ ‘ਚ ਸਭ ਤੋਂ ਵਧੀਆ ਹੈ।
ਜਡੇਜਾ ਦੱਖਣੀ ਅਫਰੀਕਾ ਵਿਰੁੱਧ 50+ ਟੈਸਟ ਵਿਕਟਾਂ ਲੈਣ ਵਾਲੇ ਦੂਜੇ ਖੱਬੇ ਹੱਥ ਦੇ ਸਪਿਨਰ ਵੀ ਹਨ। ਉਨ੍ਹਾਂ ਤੋਂ ਪਹਿਲਾਂ, ਸਿਰਫ ਇੰਗਲੈਂਡ ਦੇ ਕੋਲਿਨ ਬਲਾਈਥ ਨੇ ਇਹ ਕਾਰਨਾਮਾ ਕੀਤਾ ਸੀ, 1906 ਅਤੇ 1910 ਦੇ ਵਿਚਕਾਰ 59 ਵਿਕਟਾਂ ਲਈਆਂ ਸਨ।
ਦੱਖਣੀ ਅਫਰੀਕਾ ਨੇ ਗੁਹਾਟੀ ਟੈਸਟ ‘ਚ ਭਾਰਤ ਲਈ 549 ਦੌੜਾਂ ਦਾ ਵੱਡਾ ਟੀਚਾ ਰੱਖਿਆ, ਜੋ ਕਿ ਭਾਰਤ ‘ਚ ਕਿਸੇ ਵੀ ਟੀਮ ਦੁਆਰਾ ਦਿੱਤਾ ਗਿਆ ਸਭ ਤੋਂ ਵੱਡਾ ਟੀਚਾ ਹੈ। ਇਸ ਤੋਂ ਪਹਿਲਾਂ, ਇਹ ਰਿਕਾਰਡ 2004 ‘ਚ ਨਾਗਪੁਰ ‘ਚ ਆਸਟ੍ਰੇਲੀਆ ਦੇ ਨਾਮ ਸੀ, ਜਿਸਨੇ 543 ਦੌੜਾਂ ਦਾ ਟੀਚਾ ਰੱਖਿਆ ਸੀ। ਦੱਖਣੀ ਅਫਰੀਕਾ ਨੇ 1996 ‘ਚ ਈਡਨ ਗਾਰਡਨ ‘ਚ ਵੀ 467 ਦੌੜਾਂ ਦਾ ਟੀਚਾ ਰੱਖਿਆ ਸੀ, ਜੋ ਇਸ ਸੂਚੀ ਵਿੱਚ ਤੀਜੇ ਸਥਾਨ ‘ਤੇ ਹੈ। ਇਹ ਟੈਸਟ ਕ੍ਰਿਕਟ ‘ਚ ਭਾਰਤ ਲਈ ਕੁੱਲ ਮਿਲਾ ਕੇ ਤੀਜਾ ਸਭ ਤੋਂ ਵੱਡਾ ਟੀਚਾ ਹੈ। ਟੀਮ ਵੱਲੋਂ ਸਭ ਤੋਂ ਵੱਧ ਟੀਚਾ 2006 ‘ਚ ਕਰਾਚੀ ‘ਚ ਪਾਕਿਸਤਾਨ ਵੱਲੋਂ 607 ਦੌੜਾਂ ਦਾ ਰੱਖਿਆ ਗਿਆ ਸੀ।
